OOS-KAAP. – Shervago Hanse (29) het glo Saterdag per ongeluk ‘n kleuter (2) tydens ‘n argument by ‘n huis in Albatrosstraat, Reservoir Hills, Despatch, met ‘n klip getref. Hanse is ná die voorval doodgesteek, waarna die verdagte deur die polisie op Despatch in hegtenis geneem is.
Kapt. Sandra Janse van Rensburg, polisiewoordvoerder, sê in ‘n verklaring die voorval het omstreeks 04:00 gebeur. Die vrou van die huis wou na bewering hê dat haar kinders se vriende die perseel moes verlaat ná ’n drinkpartytjie. Terwyl die vriende aan die vertrek was, het een van hulle in ’n woordewisseling met die vrou se dogter betrokke geraak en ’n klip gegooi, wat die kleuter getref het.
Die kleuter se oom het, toe hy sien sy nefie is beseer, glo terugbaklei en vir Hanse gesteek. Hanse is later in die hospitaal oorlede.
Die verdagte sal vandag (Maandag) op ‘n aanklag van moord in die Kariega-landdroshof voorkom.
