OOS-KAAP. – ‘n Man (69) en sy vrou is Dinsdagaand omstreeks 22:30 in hulle huis op ‘n plaas by Committees Drift, buite Makhanda (Grahamstad) oorval, vasgebind en beroof.
Kapt. Marius McCarthy, polisiewoordvoerder, sê aan Nuusflits volgens rapportering het ses mans, van wie minstens drie vuurwapens gehad het en almal vermom, die huis binnegedring. Die egpaar is met gordels vasgebind en in die badkamer toegesluit, terwyl die aanvallers kontant, juweliersware, vyf selfone, ’n digitale kamera, twee pare jagstewels en ’n beursie met kaarte gebuit het. Een van die slagoffers het deur ’n badkamervenster van die plaashuis ontsnap en hulp by ’n nabygeleë gastehuis ontbied. Niemand is tydens die voorval beseer nie.
Enigiemand met inligting wat tot die inhegtenisneming van die verdagtes kan lei, word gevra om kapt. Maxakana by 072 735 0048 te bel.
