GAUTENG. – ’n Man (42) is deur die polisie in hegtenis geneem nadat die liggaam van Juanita Vermeulen, sy vrou, in die kattebak van ’n motor by ’n winkelsentrum in Brackendowns, Alberton, gevind is. Vermeulen was die ma van ’n negejarige dogter.
Lt.kol. Mavela Masondo het aan Nuusflits gesê die vrou is Vrydag deur ’n vriendin as vermis by die Alberton-polisiestasie aangemeld. ’n Soektog is onmiddellik van stapel gestuur en haar liggaam is later in die kattebak van haar wit BMW in die Brackenhurst-gebied gevind. Sy het steekwonde opgedoen en is op die toneel dood verklaar.
’n Moorddossier is geopen en die eenheid vir ernstige en gewelddadige misdade het die ondersoek oorgeneem. Die ondersoek het Saterdag tot die man se inhegtenisneming gelei. Hy sal na verwagting Maandag op ’n aanklag van moord in die Alberton-landdroshof verskyn.
Volgens ‘n berig van Caxton Network News is die liggaam deur twee mans ontdek wat glo genader is om vir die dag die bestuurders van die betrokke motorvoertuig te wees.
Morné Swart het ‘n sosialemediaplasing gemaak waarin die oorledene as Juanita Vermeulen geïdentifiseer is. Sy is volgens haar Facebook-blad ‘n finansiële direkteur by Cyber Squirrel Pty Ltd.
Dezel van der Merwe het ‘n hartseer sosialemediaplasing gemaak om te sê sy sal haar vriendin mis.
Genia van Heerden het gesê:
