VRYSTAAT. ‘n Man (23) het vandag (Vrydag) op ‘n aanklag van poging tot moord in die Ladybrand-landdroshof verskyn nadat hy glo sy ouma (59) in Borwa naby Tweespruit met ‘n kussing probeer versmoor het om rang en erkenning in ‘n bende te verkry.
AO Mmako Mophiring, polisiewoordvoerder, sê die vrou het Sondag 19 April omstreeks 20:00 geslaap. Sy is glo wakker gemaak toe iemand ’n kussing oor haar gesig gedruk het in ’n poging om haar te versmoor. Sy het teruggeveg en ontdek dat dit haar kleinseun was, waarna hy weer probeer het om haar te versmoor. Dit is die tweede keer wat hy haar glo probeer versmoor het.
Die vrou beweer die verdagte het gesê hy volg opdragte van ’n bende bekend as “BTK” (Born to Kill) en dat hy ’n familielid moes doodmaak om rang en erkenning in die groep te kry. Sy het daarin geslaag om te ontsnap en hulp by bure gaan soek, waarna die saak op 22 April by die polisie aangemeld is en die verdagte later in hegtenis geneem is. Die polisie maan ouers en versorgers om waaksaam te wees vir tekens van ongewone gedrag by jong mense wat by verdagte groepe betrokke kan wees, en om vroegtydig hulp van owerhede of maatskaplike dienste te soek.
Die saak is vir ’n borgtogaansoek en verdere regsreëlings in die Tweespruit-landdroshof uitgestel.
