KWAZULU-NATAL. – Sphamandla Mdletshe (37) is deur die streekhof in Richardsbaai tot tien jaar tronkstraf gevonnis nadat hy skuldig bevind is aan die diefstal van minerale ter waarde van R26 miljoen.
Die saak het in Maart 2024 begin toe die polisie ’n verlate vragmotor vol sirkoonminerale by Kwambonambi opgespoor het. Verdere ondersoek het hulle na ’n huis in Isipingo, Durban, gelei, waar 500 sakke minerale wat aan Richards Bay Minerals behoort het, gevind is.
Die ondersoek het tot die inhegtenisname van 11 verdagtes gelei wat van diefstal van minerale, geldwassery en afpersing aangekla word. Mdletshe is in Augustus 2025 in die Noordwes-provinsie gevang nadat hy die owerhede byna ’n jaar lank ontduik het. Hy het sy borgtogaansoek laat vaar en in aanhouding tot sy skuldigbevinding gebly.
Die saak teen die res van die bende is tot 27 Augustus 2026 uitgestel.
Lt.genl. Puleng Dimpane, waarnemende nasionale kommissaris van die SAPD, het die vonnis verwelkom en gesê dit stuur ’n boodskap dat diefstal van minerale en georganiseerde misdaad nie geduld sal word nie.
