WES-KAAP. – ‘n Man, vermoedelik in sy vroeë 50’s, het Sondag naby die Goukou-riviermond in Stilbaai verdrink.
Stéfan Grové, die stasiebevelvoerder van NSRI Stilbaai, sê hulle is Sondagmiddag net voor 16:00 van ‘n verdrinking ingelig. Die polisie, reddingswemmers en ‘n reddingstuig is geaktiveer. Daar is na die man gesoek wat volgens ‘n ooggetuie deur die rivier wou swem, maar na die see meegesleur is en vermis geraak het.
Die man is opgespoor, maar hy is dood verklaar, waarna sy liggaam na die NSRI Stilbaai-stasie geneem is en aan patologiese dienste oorhandig is.
‘n Geregtelike doodsondersoek is geopen.
