‘n Man se arm is geamputeer nadat sy voertuig Vrydagaand op die R102 in Canelands, KZN, omgeslaan het.
Lede van Reaction Unit South Africa (Rusa) is omstreeks 18:20 na die toneel ontbied waar ‘n wit Mercedes-Benz Sprinter op sy sy gelê het.
Die bestuurder is langs die motor gevind. Sy regterarm is deur die ongeluk afgeruk.
Die vroulike passasier het beamptes ingelig dat hulle in die Verulam-rigting op pad was. Die bestuurder het glo gedraai om uit die pad van twee motors wat gejaag het te kom.
Die ernstig beseerde man is op die toneel behandel voor hy met ‘n ambulans na ‘n hospitaal geneem is.
