ISRAEL. – Mandla Mandela, stamhoof van die Mvezo- tradisionele raad en kleinseun van oudpresident Nelson Mandela, is een van die mense wat deur die Israeliese vloot in aanhouding geneem is nadat die Global Sumud-flottielje op pad na Gasa voorgekeer is.
Lees ook: Gasa-flottielje deur Israeliese vloot gekeer
In ‘n voorafopgeneemde boodskap op sosiale media sê Mandela: “Op die Global Sumud Flotilla was burgerlikes wat toegewy is daaraan om die aandag te vestig op die haglike omstandighede wat Palestyne moet deurgaan. Hulle missie is vreedsaam. Hulle doelwit is humanitêr. Die voorkeer van die flottielje stel weer die werklikheid bloot dat Gasa onder beleg is, nie net deur mure en beheerpunte nie, maar deur oorlogskepe, hommeltuie en beleide van isolasie”.
Die GSF het die Suid-Afrikaanse regering gevra om onmiddellik aksie te neem om seker te maak dat die Suid-Afrikaanse burgers veilig teruggebring word.
Chrispin Phiri, die SA-woordvoerder van die departement van internasionale samewerking en betrekking (Dirco), het Suid-Afrika se oproep om te voldoen aan internasionale wet beklemtoon.
Die voormalige EFF-MP Mbuyiseni Ndlozi het Mandla Mandela geprys en gesê: “Jy maak ons trots Madiba.”
Bronne: IOL, SABC News, Daily Mail
