OOS-KAAP. – Die Suid-Afrikaanse Menseregtekommissie (SAMRK) het dr. Rolene Wagner, die gesondheidshoof van die Oos-Kaap, gedagvaar om voor die kommissie te verskyn oor beweerde stelselmatige probleme in openbare gesondheidsdienste in die provinsie. Die verhoor sal Dinsdag van 10:00 tot 12:00 by die Menseregtekommissie se raadsaal in Oos-Londen plaasvind.
Volgens die kommissie volg die stap ná talle klagtes oor swak dienslewering by gesondheidsfasiliteite regoor die Oos-Kaap. Die klagtes dui op herhalende probleme by klinieke en hospitale in sowel landelike as stedelike gebiede. Volgens die kommissie sluit die probleme onder meer vervalle infrastruktuur, tekorte aan gesondheidswerkers, beperkte toegang tot noodsaaklike medikasie en behandeling, asook langdurige watertekorte by sommige fasiliteite in. Daar is ook klagtes oor klinieke wat sonder voldoende alternatiewe reëlings gesluit word.
Die kommissie sê hy het reeds verskeie kere skriftelik inligting en verduidelikings van die departement versoek, maar dat die reaksie onvoldoende was. Daarom is ’n dagvaarding aan die gesondheidshoof uitgereik om duidelike antwoorde te kry en aanspreeklikheid te verseker. Versuim om aan die dagvaarding te voldoen, kan ingevolge die wet tot boetes of selfs tronkstraf lei.
