LEES OOK: Kersinkopies: Verbruikers sal prys betaal vir Durban-hawekrisis
Sindisiwe Chikunga, die minister van vervoer, sal die feesseisoen se padveiligheidsveldtog amptelik hierdie naweek by die Tsakane-stadion oos van Johannesburg bekendstel. Die veldtog se hooffokus vanjaar is op hoe alkohol bestuursgedrag beïnvloed en hoe dit tot ongelukke op die land se paaie bydra.
Simon Zwane, die woordvoerder van die padverkeersbestuurskorporasie, sê daar sal ook ’n herdenking wees vir al die slagoffers van padongelukke. Die wêreld herdenk jaarliks op die derde Sondag van November die Wêrelddag van Herinnering vir Padverkeerslagoffers.
Volgens die departement van vervoer se persverklaring bring die feesseisoen verhoogde risiko’s vir openbare veiligheid op die paaie as gevolg van hoë verkeersvolumes namate mense na verskeie bestemmings regoor die land reis. Alle groot roetes word besiger as normaal, vandaar die behoefte om padveiligheidsopvoeding en verkeerswetstoepassingsaktiwiteite op ‘n geïntegreerde wyse te verskerp.
Die doel van die veldtog is nie net om gladde verkeersvloei te verseker nie, maar ook om nalatige en roekelose bestuur te voorkom wat tot padongelukke, beserings en sterftes kan lei.
Zwane het gesê: “Ons ontleding sê vir ons dat ons moet fokus op die vyf provinsies wat 80% van die sterftes op die Suid-Afrikaanse paaie bydra. Dit is Gauteng, KwaZulu-Natal, Oos-Kaap, Wes-Kaap, en Limpopo. Ons sal dus daarop fokus, maar ons verstaan ook nou dat hulle in die provinsies en munisipaliteite nie na-ure werk nie, so daar is geen 24-uur-skof nie, maar sterftes gebeur wel. Die meeste gebeur in die nag, so ons sal ook die mannekrag daar aanvul om hulle te help om daardie gaping na-ure te sluit.”
#Vervoer #Feesseisoen #Afrikaans #Nuus #Newsfeed
Bronne gebruik: SABC Nuus; Departement van vervoer se persverklaring (21 November 2023).
