GAUTENG. – Hou versigtig aan met ry, al is dit stadig en op die velling (rims) van die voertuig. Life Traffic NPO waarsku motoriste om wanneer hulle slagoffers van skerpgemaakte spykers is, nie in ‘n donker of geïsoleerde gebied stil te hou nie. Die waarskuwing kom nadat nog ‘n motoris verlede Vrydag, ná 20:00, sy lewe verloor het toe hy deur booswigte geskiet is.
Die motoris is op die N1 noordwaarts, ongeveer 38,4 km van die Carousel-tolplaza en Maubane-afrit, in ‘n vermoedelik beplande ysterpenlokval geskiet. Met dié wat die voertuig stadiger gery en stilgehou het, het die aanvallers vermoedelik geskiet. Die bestuurder is op die toneel dood verklaar. Geen passasiers is gemeld as beseer nie.
Motoriste word gewaarsku, as jy ‘n slagoffer is, ry totdat jy ’n goed verligte petrolstasie, ’n polisievoertuig of enige plek met mense kan bereik. Jou lewe is baie meer werd as die bande, wiele of die voertuig. Motoriste word aangemoedig om by die plaaslike WhatsApp- en Telegram Spiking-groep vir hulle roete aan te sluit. Op hierdie groepe kan jy vir hulp vra en jy sal ook regstreeks waarskuwings en betroubare verkeersopdaterings ontvang en ingelig bly.
Druk hier om na die Life Traffic NPO kanaal te gaan.
