WES-KAAP. – Die polisie ondersoek ’n reeks geweldsvoorvalle in KwaNonqaba, Mosselbaai. Ongeveer 55 hutte is eers in die Asla Park- informele nedersetting aan die brand gesteek, waarna drie persone dood aangetref is. Ondersoeke na die voorvalle duur voort.
Volgens polisiewoordvoerder, brig. Novela Potelwa, het lede van George se openbare orde-polisiëring en die plaaslike polisie saam met die brandweer- en rampbestuurspanne die situasie gestabiliseer, wat tot die verplasing van verskeie inwoners gelei het.
Kort ná die geweld is die liggame van twee mans van Mosambiekse oorsprong, onderskeidelik 27 en 43 jaar oud, met ernstige beserings gevind. Hulle is met aankoms by ‘n plaaslike hospitaal dood verklaar. In die derde voorval vroeg Sondagoggend is die liggaam van ’n 18-jarige met steekwonde by New Rest- informele nedersetting ontdek.
Die polisie sê daar is nog geen inhegtenisnemings in die moordondersoeke van die Mosambiekers gemaak nie. In die moordsaak van die 18-jarige word daar na ‘n bekende verdagte gesoek. Vyf verdagtes is wel in verband met geweld in hegtenis geneem. Twee van hulle het reeds op aanklagte van openbare geweld in die hof verskyn, terwyl drie ander na verwagting op aanklagte van beweerde gesteelde goedere in die hof sal verskyn.
‘n Beroep is deur die polisie op gemeenskappe gedoen om wettige prosesse te respekteer tydens protesoptrede en om nie onbevestigde inligting te versprei nie, aangesien dit paniek kan veroorsaak. Die situasie in die gebied is tans onder beheer, met verhoogde polisieteenwoordigheid om orde te handhaaf.
Volgens die Mosselbaai-munisipaliteit was daar sedert Sondag geen verdere voorvalle van geweld of skade aan eiendom aangemeld nie. Die munisipaliteit het bevestig dat ongeveer 55 houthutte en sinkstrukture tydens die onrus in die Asla Park-omgewing aan die brand gesteek is. Geraakte persone word tans tydelik in verskeie munisipale gemeenskapsfasiliteite gehuisves, waarvan die ligging om veiligheidsredes nie bekend gemaak word nie. Volgens die munisipaliteit is verhoogde veiligheid en wetstoepassing by al die skuilings ontplooi, terwyl humanitêre hulp deur regeringsdepartemente, NGO’s, kerke en gemeenskapsorganisasies verskaf word. Kos, mediese sorg en basiese noodhulp word voorsien.
Die munisipaliteit het ook bevestig dat diplomatieke verteenwoordigers van sommige van die geraakte buitelandse burgers reeds betrokke geraak het en dat reëlings getref word vir die veilige vervoer na alternatiewe bestemmings. Die gemeenskap is bedank vir groot ondersteuning, insluitend skenkings van kos, klere en noodsaaklike items. Volgens die munisipaliteit word verdere skenkings nie tans benodig nie. Intussen bly munisipale spanne op die grond aktief om ondersteuning te koördineer en seker te maak dat hulp op ’n ordelike en menswaardige wyse gelewer word.
