GAUTENG. – Bellarmine Chatunga Mugabe (28) en sy medebeskuldigde, Tobias Tamirepi Matonhodze (33), het Maandag op ‘n aanklag van poging tot moord in die Alexandra-landdroshof voorgekom. Die hofverskyning spruit uit die beweerde poging tot moord op ’n slagoffer in Hyde Park op 19 Februarie. Mugabe is die seun van Zimbabwe se voormalige omstrede president, Robert Mugabe.
Volgens Magaboke Mohlatlole, NVG-woordvoerder, het konflik in Mugabe se huis uitgebreek waartydens die verdagtes glo die slagoffer aangerand het. Die slagoffer het probeer vlug, maar is in die rug geskiet en het buite die hek neergeval. Een van die verdagtes het glo die afstandbeheerkontrole van die slagoffer geneem, na die eiendom teruggekeer en die hek toegemaak.
’n Veiligheidswag van ’n buurhuis het die slagoffer buite sien lê en onmiddellik die polisie ontbied. Die verdagtes is later in hegtenis geneem en van poging tot moord, regsverydeling, die besit van ’n onwettige vuurwapen en ammunisie, diefstal, en oortreding van die immigrasiewet aangekla.
Die hof het die saak tot 3 Maart uitgestel om die staat se ontbrekende inligting na te gaan en ’n formele borgtogversoek te oorweeg. Beide verdagtes bly in aanhouding.
