GAUTENG. – Twee senior munisipale amptenare van Ekurhuleni-metro, onderskeidelik 50 en 40 jaar oud, is Saterdag en Sondag op aanklagte van bedrog, korrupsie en regsverydeling in hegtenis geneem. Die verdagtes is vir dieselfde saak in hegtenis geneem en sal na verwagting vandag in die Boksburg-landdroshof verskyn.
Brig. Athlenda Mathe sê die inhegtenisneming is deur die polisie se taakspan, wat met die Madlanga-kommissie verband hou, uitgevoer. Sy sê die saak spruit uit ’n deurlopende ondersoek na beweerde korrupsie binne die Ekurhuleni-metropolisie (EMPD) en dat nog verdagtes moontlik betrokke kan wees.
Mathe het egter beklemtoon dat die ondersoek nie verband hou met enige Opod-saak, die Mbense-voorval of die sogenaamde blouligsaak nie. Volgens die brigadier sal verdere besonderhede later bekend gemaak word.
