Bedryfskoste soos hoë brandstofpryse en instandhoudingsuitgawes dra by tot die verhoging van die MyCiTi-bus-tariewe.
Volgens ’n verslag uitgereik deur die Stad Kaapstad se Direktoraat vir Stedelike Mobiliteit is dit bedoel om die langtermyn-volhoubaarheid van die diens te verseker. Bedryfskoste soos hoë brandstofpryse en instandhoudingsuitgawes dra by tot dié besluit. Verder is die Stad ook onder druk weens naderende befondsingsbesnoeiings deur die nasionale regering.
Volgens die Stad se burgemeesterskomiteelid vir stedelike mobiliteit, raadslid Rob Quintas, bly MyCiTi een van die mees bekostigbare openbare vervoerdienste.
“Geen sektor is onaangeraak deur die stygende brandstofkoste as gevolg van die voortdurende krisis in die Midde-Ooste nie. MyCiTi is geen uitsondering nie. Ons bedryfskoste om ‘n wêreldklas- openbare vervoerdiens te lewer, saam met brandstofprysstygings, het ons huidige tariefaanpassings bepaal.
Quintas plaas klem daarop dat MyCiTi ‘n gesubsidieerde openbare diens is en dat die Stad geen wins maak deur dit aan pendelaars te verskaf nie.
Die tariefverhogings is soos volg:
- Tussen 38% en 45% vir 0 tot 20 km-afstande.
- Tussen 32% en 37% vir langer afstande.
- ’n 50%-verhoging in die Maandpas van R1 500 na R2 250
Die nuwe tariewe sal vanaf 1 Julie 2026 geld, ná goedkeuring van die konsepbegroting deur die Raad op 29 Junie 2026.
Bron: Die Stad Kaapstad
