NOORD-KAAP. – Die soektog na vyf mynwerkers wat steeds ondergronds by die Ekapa-myn in Kimberley vasgekeer is, duur voort. Die werkers is sedert ‘n modderstorting vroeër die week vasgekeer. Die skag het met water en modder opgevul, wat redding bemoeilik.
Geen kommunikasie is nog met die mans gemaak nie. ‘n Gebedsaksie het buite die myn plaasgevind ter ondersteuning van die families van die vasgekeerde mynwerkers. Gwede Mantashe, minister van minerale en petroleum-hulpbronne, het gesê dat reddingswerk voortgaan en dit langer neem as wat verwag is, weens die moeilike omstandighede ondergronds.
Die myn en reddingspanne bly besig om water uit die skag te pomp en ’n veilige roete na die plek waar die werkers vermoedelik is, te probeer oopmaak.
Bronne: Newzroom Afrika en SABC News
