OOS-KAAP. – ’n Nederlandse vrou (63) is tydens ’n huisroof op ’n plaas naby Makhanda aangeval en vasgebind, nadat twee gewapende mans glo haar huis binnegedring het.
Kapt. Marius McCarthy, polisiewoordvoerder, sê die voorval het op 7 Augustus 2026 omstreeks 22:00 plaasgevind. Die vrou was in haar huis op die plaas toe sy ’n skoot buite gehoor het. Toe sy ondersoek instel, het sy twee mans in ’n gastekamer aangetref. Die verdagtes het haar met geweld gegryp en geld geëis. Sy het hulle meegedeel dat sy nie geld by haar het nie, maar dat daar geld in haar kantoor is.
Die mans het haar daarna na ’n ander vertrek gesleep en haar hande met ’n koord van die badkamerblindings vasgebind. Sy is deur die verdagtes gewaarsku dat hulle haar sou doodmaak indien hulle nie geld in die kantoor kry nie en het met haar wit Suzuki Jimny daarheen gery. Die vrou kon haarself losmaak, nadat sy seker was dat die verdagtes weg is. Sy het die bosse ingevlug en daar tot sonsopkoms weggekruip, waarna sy na huise van personeel naby die kantoor gehardloop het. Hulle het haar gehelp en die plaasbestuurder gekontak. Privaat veiligheidsdiens en die polisie is ontbied.
Verskeie waardevolle items is tydens die huisroof gesteel, waaronder die vrou se Duitse paspoort, ’n Leica-kamera en verkyker, ’n Savage 22/410-kombinasiehaelgeweer en ammunisie, ’n Apple MacBook en iPhone, ’n diamanthalssnoer en ring met ’n wit opaalsteen, asook haar wit 2016 Suzuki Jimny. ’n Onbekende bedrag geld is ook gebuit.
Die polisie ondersoek die huisroofsaak en doen ’n beroep op enigiemand met inligting wat kan help om die verdagtes op te spoor, om die naaste polisiestasie te kontak.
