NIGERIë. – Minstens 50 mense is dood nadat gewapende mans op motorfietse Donderdagnag en Vrydagoggend ’n dorpie in noordwes-Nigerië bestorm het, is deur Al Jazeera berig. Die dodelike aanval het in die Zamfara-staat plaasgevind, ’n streek wat al lank onder aanhoudende geweld en gewapende bendes gebuk gaan.
“Hulle het van een dorpie na ’n ander beweeg … en minstens 50 mense dood agtergelaat,” het Hamisu A. Faru, ’n wetgewer wat Bukkuyum-Suid verteenwoordig, gesê.
Volgens Al Jazeera het Faru Vrydag telefonies aan die nuusagentskap Reuters gesê die totale getal mense wat ontvoer is, is nog nie bekend nie, aangesien plaaslike amptenare steeds lyste van vermistes saamstel.
Inwoners sê daar was waarskuwingstekens voor die aanval. Abdullahi Sani (41) het gesê dorpenaars het veiligheidsmagte gewaarsku nadat hulle die vorige dag meer as 150 motorfietse met gewapende mans opgemerk het, maar geen optrede is geneem nie.
Owerhede het gesê bendes swaar gewapende rowers het die dorpie omsingel voordat hulle op inwoners losgebrand het, wat tientalle dood en baie ander beseer gelaat het.
Veiligheidsmagte is intussen na die gebied ontplooi, terwyl amptenare die volle omvang van die sterftes en skade bepaal.
Zamfara en ander dele van noordwes-Nigerië is die afgelope jare herhaaldelik geteiken deur misdaadbendes, plaaslik bekend as bandiete, wat betrokke is by moorde, ontvoerings en aanvalle op dorpe.
Bronne: Firstpost Facebook, Al Jazeera
