GAUTENG. – Die polisie sê hulle neem kennis van nog ‘n video wat op sosiale media versprei word, waarin twee polisielede daarvan beskuldig word dat hulle omkoopgeld van ’n verdagte geëis het.
Volgens polisiewoordvoerder, kol. Dimakatso Nevhuhulwi, het die voorval na bewering op 4 Junie tydens Operasie Shanela in die Wierdabrug-polisiëringsgebied plaasgevind. Daar word beweer dat die beamptes ’n man wat op ’n fiets gery het, voorgekeer en sy fiets in beslag geneem het. Hy is daarna glo in ’n polisievoertuig na die Wierdapark-gemeenskapspark geneem, waar hy na bewering geld moes betaal om vrygelaat te word.
Volgens die polisie is die betrokke beamptes reeds geïdentifiseer en ’n interne dissiplinêre saak is teen hulle geopen. ’n Formele ondersoek is ook begin om die feite van die voorval vas te stel en alle bewerings word tans ondersoek.
Die polisie doen weer ’n beroep op die publiek om enige vorm van korrupsie deur lede van die polisie aan te meld. Hulle beklemtoon dat sosiale media wel bewusmaking kan help, maar dat sake formeel aangemeld moet word sodat verklarings onder eed geneem kan word en sterk sake vir vervolging gebou kan word.
Klagtes kan aangemeld word by die Teen-korrupsie-hulplyn 0800 701 701, die Nasionale Diensklagtesentrum 0800 333 177, of die Onafhanklike Polisieondersoekdirektoraat (IPID).
