KWAZULU-NATAL. – Nooddienste in Mkondeni het hulle Dinsdagoggend na ’n gesimuleerde motorongelukstoneel gehaas waarin ’n hibriede voertuig betrokke was. Die oefening is gehou om samewerking en reaksie met nuwe nooddiens-voertuigtegnologie te toets. ‘n Botsing tussen ‘n vragmotor en die hibriede motor is in Van Eckstraat voorgestel. Die Pietermaritzburg-brandweer was eerste op die toneel.
Craig Botha van KwaZulu Private Ambulance Service sê die oefening het omstreeks 09:30 begin. Die scenario het verskeie uitdagings ingesluit, onder meer ’n slagoffer wat vasgekeer was, een wat uit die voertuig geslinger is, ’n kind as passasier en ’n voetganger wat getref is. Die brandweer was eerste op die toneel en het veiligheidsmaatreëls ingestel om moontlike elektriese en chemiese gevare te hanteer wat met hibriede voertuie verband hou. Nadat die toneel veilig verklaar is, kon paramedici van EMRS-ambulansdiens toegang tot die pasiënte kry.
Volgens die owerhede is die oefening gebruik om die spesiale protokolle te toets wat gevolg moet word wanneer noodpersoneel met hibriede of elektriese voertuie werk. Hierdie voertuie vereis ekstra voorsorgmaatreëls weens hoëspanningsisteme en batteryrisiko’s. Die oefening is deur verskeie instansies bygewoon, insluitend SANRAL, N3 Toll Concession, die Pietermaritzburg-brandweer, EMRS-ambulansdiens en KwaZulu- private ambulansdiens. Van Eckstraat is vir sowat ’n uur gesluit om die oefening veilig te laat verloop sonder om verkeer of die publiek te beïnvloed.
