Die nasionale vervolgingsgesag het sterk gereageer op dreigemente wat op sosiale media versprei word teen ’n aanklaer wat by die Julius Malema-saak in die kuGompo-streekhof (Oos-Londen) betrokke is.
Kaizer Kganyago, NVG- nasionale woordvoerder, sê die organisasie het kennis geneem van plasings op die platform X wat glo met die EFF verbind word, waarin ernstige dreigemente teen die betrokke aanklaer gemaak word. Die NVG beklemtoon dat enige vorm van intimidasie of dreigemente teen aanklaers onaanvaarbaar is, aangesien hulle grondwetlik verplig is om hul werk sonder vrees, vooroordeel of begunstiging uit te voer. Die gesag sê verder enige dreigemente, ongeag of dit as ernstig beskou word of nie, by die polisie vir ondersoek aangemeld moet word. Sulke optrede word as ’n bedreiging vir die regstelsel beskou en ondermyn die beginsel van die oppergesag van die reg.
Die NVG het ook sy kommer uitgespreek oor die veiligheid van aanklaers in die Oos-Kaap, waar drie aanklaers in die afgelope twee jaar vermoor is. Intussen sê die NVG hy bly daartoe verbind om sy aanklaers te beskerm en te verseker dat hulle hul werk veilig en onafhanklik kan verrig.
