GAUTENG. – Die Valke het bevestig dat ’n ondersoek aan die gang is om vas te stel of enige beweerde misdrywe, insluitend mensehandel, onwettige werwing, uitbuiting of bedrog, bygedra het dat 17 Suid-Afrikaanse mans glo in die Oekraïne/Rusland-konflik vasgevang is. Twee Zuma-susters het sake oopgemaak. Die Valke bly in kontak met die klaers en familielede van die mans.
Brig. Thandi Mbambo, Valke-woordvoerder, sê die ondersoek spruit uit ’n klag wat deur Nkosazana Zuma-Mncube by die Sandton-polisiestasie ingedien is. ’n Tweede klag is op Sondag deur Duduzile Zuma geregistreer. Die presiese aanklagte sal bepaal word wanneer die ondersoek afgehandel is en alle bewyse geëvalueer is.
Mbambo bevestig die Valke werk saam met verskeie regeringsdepartemente en buitelandse owerhede om ’n gekoördineerde en omvattende benadering te verseker. Hierdie samewerking maak voorsiening vir ’n ondersoek wat binne die wetlike raamwerk van alle betrokke strukture geskied, veral met betrekking tot internasionale betrekkinge, identiteitsverifikasie en betrokkenheid van buitelandse wetstoepassing. As deel van die ondersoekproses bly die Valke in kontak met die klaers en familielede en terugvoering, wat nie die ondersoek se integriteit sal benadeel nie, sal aan hulle gegee word.
Wanneer die ondersoek voltooi is en alle relevante bewyse ingesamel is, sal die dossier vir ‘n besluit – of vervolging sal plaasvind aldan nie – aan die nasionale vervolgingsgesag voorgelê word.
Die Valke het aangedui dat geen verdere besonderhede in hierdie stadium in die openbare domein bekend gemaak sal word nie, sodat die integriteit van die ondersoek beskerm word. Die direktoraat beklemtoon dat die saak hoë prioriteit geniet en dat alle nodige stappe gedoen word om die feite vas te stel en aanspreeklikheid te verseker waar nodig.
