Dié rubriek is deur Bybel-Media geskryf.
Hoe om daar te wees vir familie wat deur ’n moeilike tyd gaan
Een van die moeilikste ervarings wat ons soms beleef, is wanneer dit vir ons voel daar is niks wat ons kan doen vir iemand vir wie ons lief is nie. Dit laat ons magteloos en selfs afgesonder voel van die mense aan wie ons normaalweg die naaste leef. Hier is vir jou ’n paar maniere as jy geliefdes in ’n moeilike tyd wil bystaan, maar nie weet hoe nie.
Hou hulle in jou gedagtes
Dra jou geliefdes elke dag in jou gedagtes met jou saam. Glo dat hulle met die nodige krag, gerusstelling en genesing geseën sal word. Jy kan aanbied om persoonlik of oor die foon met hulle te praat oor die dinge waarmee hulle stoei. Die wete dat iemand anders saam met hulle deur hulle moeilike tyd wil loop, sal vir hulle baie beteken.
Wees teenwoordig en luister
Daar is tye dat ons nie kan verstaan hoe iemand anders voel nie; dit beteken egter nie ons kan nie aan hulle waardevolle ondersteuning bied nie. Veral wanneer dit by familie kom, is geliefdes se nabyheid en daarwees baie belangrik. Deur na iemand te luister of kwaliteittyd saam met hulle deur te bring, kan hulle deur ’n moeilike tyd dra.
Bied praktiese hulp aan
Ons almal het al in moeilike tye ervaar dat alledaagse take al laer op ons prioriteitslys staan. Iets klein soos om aan te bied om kos te maak of met huishoudelike take te help kan mense wat deur ’n moeilike tyd gaan, laat besef hoe groot hulle ondersteuningsnetwerk werklik is.
Gee emosionele ondersteuning
Verseker dat die regte boodskap hulle op die regte tyd bereik. Deel bemoedigende Bybelgedeeltes, getuienisse of aanhalings met hulle. Nooi hulle saam na jou geloofsgemeenskap se byeenkomste, of bied aan om saam met hulle by aanlyn geleenthede in te skakel. Sosiale interaksie kan hulle laat voel dat hulle deel van ’n ondersteunende gemeenskap is en hulle deur hulle tyd van swaarkry dra.
’n Klein gebaar kan ’n blywende impak op iemand maak.
