VIRGINIA, AMERIKA. – ‘n Onderwyser by ‘n skool in Virginia is op tydelike verlof geplaas ná hy glo openlik geweier het om transgender leerlinge op hul gekose voornaamwoorde te noem.
Byron ‘Tanner’ Cross het Dinsdag by ‘n Loudoun skoolvergadering gepraat oor transgender studente toe hy dié uitlating gemaak het.
“Dit is nie my bedoeling om enigiemand seer te maak nie,” het hy in ‘n aanlynvideo gesê. “Maar daar is waarhede wat ons moet aanvaar.”
“Ek is baie lief vir al my studente, maar ek sal nooit vir hulle jok nie, maak nie saak wat die uitkoms is nie. Ek is ‘n onderwyser, maar ek dien God eerste, en ek sal dit nie goedkeur dat ‘n biologiese seun ‘n meisie kan wees nie, en andersom, want dis teen my geloof.”
“Dis jok vir ‘n kind, dis mishandeling van ‘n kind, en dis ‘n sonde vir ons God,” het hy gesê.
Die onderwyser is geskors en die skool het ouers via e-pos hiervan ingelig. “Omdat hierdie persoonlik is, kan ek nie verder uitbrei nie,” het Shawn Lacy, skoolhoof van die skool gesê.
Die onderwyser se vrou het egter op ‘n Facebook-inskrywing gesê dat hy geskors is as gevolg van sy praatjie.
Sy het ook geskryf dat haar man hartseer was omdat hy nie die kans gegun is om sy leerlinge te groet nie en dat hy “alles in sy vermoë” sal doen om weer na sy werk terug te keer.
