OOS-KAAP. – Die departement van vervoer in die Oos-Kaap waarsku motoriste om versigtig te wees, nadat verskeie paaie tans gesluit of moeilik begaanbaar is. Dit kom ná swaar reën, oorstromings en koue weer oor dele van die provinsie voorgekom het.
Koue weer het met ligte sneeu in Rubidgekloof in die rigting van Nieu-Bethesda, asook tussen Carlton Heights op die roete tussen Middelburg en Noupoort, gepaard gegaan. In Gqeberha is die N2, naby Volvo Trucks, oorstroom en vir verkeer gesluit. Motoriste word aangeraai om die afrit by Deal Party na John Tallant te neem. Die M4-afrit vanaf Summerstrand na die N2 is ook oorstroom en verkeersbeamptes is teenwoordig om die verkeer te beheer. Nog paaie wat oorstroom en gesluit is, is die R102 tussen Gamtoosmond en Thornhill, die N2 agter Goods Shed in die rigting van Bluewater Bay, asook die Addo-pad onder Grahamstad. In nog ’n voorval het ’n sypaadjie in die William Moffett-omgewing in die rigting van Laerskool Walmer West, naby ’n substasie, meegegee en die publiek word gemaan om versigtig te wees. Omgewaaide takke en klein bome belemmer verkeer in een baan van die N2 tussen Permitvlei en Dieprivier.
Waar moontlik, moet daar liefs van alternatiewe roetes gebruik gemaak word.
