MPUMALANGA. – Sibusiso Patrick Shongwe (23) is lewenslank tronk toe gestuur nadat hy sy drie weke oue seun in Driekoppies, Nkomazi-distrik, vermoor het.
Monica Nyuswa, NVG-woordvoerder, sê die hof het bewyse, insluitend ’n belydenis van die beskuldigde en die getuienis van die moeder, Noluthando Mlambo, sowel as getuienisse van ooggetuies, in ag geneem.
Shongwe het die baba op 1 Maart 2023 ontvoer nadat hy Mlambo onder die voorwendsel ontmoet het dat hy items vir die kind sou bring. Twee dae later is die liggaam van die baba in ’n bos naby gevind. ‘n Nadoodse ondersoek het bevestig dat hy aan snywonde aan die nek gesterf het. Mlambo het verder getuig dat Shongwe haar vroeër aangespoor het om die swangerskap te beëindig en dat hy aanvanklik die vaderskap ontken het.
Die hof het bevind dat daar geen versagtende omstandighede was nie en Shongwe is lewenslank tronk toe gestuur, hy is ook onbevoeg verklaar om ‘n vuurwapen te besit en sy aansoek om appèl is afgekeur. In die vonnis het die regter sy kommer uitgespreek oor die hoë vlakke van huishoudelike geweld en geweldsmisdaad in die land, asook die skynbare gebrek aan respek vir menslike lewe.
Die NVG het beklemtoon dat hulle ten volle toegewy is om misdade teen kwesbare persone en huishoudelike geweld streng aan te spreek, en dat hulle sal voortgaan om met deeglikheid en medemenslikheid geregtigheid te soek.
