VSA. – Jordy Smith (76) en haar lewensmaat het ’n man gehuur om pype in hul huis in City Heights, San Diego, te herstel terwyl hulle tydelik elders gebly het. Volgens Smith het hy die nutsrekeninge op sy naam laat plaas en kamers aan vreemdelinge begin verhuur. Toe die egpaar terugkeer, kon hulle volgens haar nie by die huis inkom nie. Dit het sowat twee jaar geduur voordat die bewoners uitgesit is.
Smith sê sy en haar lewensmaat het tydelik verhuis nadat sy haar heup gebreek het. Sy het later vasgestel dat die man wat hulle vir die werk gehuur het, volgens haar nie ’n loodgieterslisensie gehad het nie. Sy het aan ABC 10News gesê daar was in ’n stadium sowat 15 mense in die huis. Toe sy en haar lewensmaat met die bewoners probeer praat, het dié hulle volgens haar geïgnoreer en die deur gesluit.
Die uitsetting is vertraag omdat Smith se lewensmaat, die eienaar, nie die trustdokumente kon opspoor waarmee hy sy eienaarskap kon staaf nie. Kimrey Kotchick van Squatter Squad, ’n onderneming wat eienaars met uitsettings help, het die dokumente deur die plaaslike registrasiekantoor opgespoor. Dit het daarna nog sowat vyf maande geduur voordat balju’s se adjunkte die bewoners uitgesit het. ABC 10News het uit polisierekords vasgestel dat die polisie tussen Januarie 2024 en Augustus 2026 meer as 30 keer na die huis ontbied is.
Ná die uitsetting het Smith volgens berigte ontdek dat die huis beskadig was en van haar kosbare oudhede vermis was. Die huis is later verkoop.
Bronne: ABC 10News, Realtor.com, Fox News, WHMI en Hoodline