INDIË. – Md Akbar (42) is dood nadat ‘n plafonwaaier in die noodafdeling van ‘n groot regeringshospitaal in Nieu-Delhi op sy bed geval en hom getref het, terwyl hy behandeling ontvang het.
Akbar is Saterdagaand by die Guru Teg Bahadur-hospitaal opgeneem vir behandeling van hoë bloeddruk, breinvliesontsteking en aspirasie-longontsteking. Volgens berigte het ‘n plafonwaaier omstreeks 21:30 losgekom en op sy hospitaalbed geval en hom in die onderlyf getref. Hy is sowat drie uur later dood verklaar.
Akbar se familie beweer die voorval het tot sy dood gelei en eis ‘n deeglike ondersoek na die toestand van die hospitaal se infrastruktuur. Die hospitaal hou egter vol dat Akbar aan sy bestaande mediese toestand beswyk het en nie weens die plafonwaaier nie. Volgens ‘n voorlopige ondersoek het die waaier se skag gebreek, wat veroorsaak het dat dit afgeval het.
Die minister van gesondheid in Delhi het intussen ‘n ondersoekspan aangestel om die voorval te ondersoek. Indien nalatigheid vasgestel word, sal dissiplinêre stappe geneem word.
Bronne: Hindustan Times, The Indian Express, Press Trust of India (PTI), NDTV
