Die staat is tans op hoë gereedheid oor die vlaag vals inligting wat rondom migrasie versprei word. Volgens ‘n amptelike waarskuwing ondermyn hierdie leuens die publiek se vertroue. Dit kan ook tot ernstige sosiale onrus lei.
Een van die grootste bronne van paniek was ‘n vervalste plakkaat wat beweer het dat alle “onwettige buitelanders” Suid-Afrika teen 30 Junie 2026 moes verlaat.
Die Suid-Afrikaanse Polisiediens het bevestig dat hierdie plakkaat ongemagtig en vals is.
‘n Gerug het onlangs beweer dat die supermarkgroep Spar 15 000 nuwe poste beskikbaar het omdat buitelandse werkers die land weens betogings verlaat het. Spar het dit amptelik ontken.
Daar word gereeld beweer dat die teenwoordigheid van ongedokumenteerde migrante in die land verantwoordelik is vir die meerderheid van die misdaad in Suid-Afrika.
Hoewel daar uitdagings met grensbeheer is, wys data dat getalle dikwels wild oordryf word om politieke agendas te dryf.
Daar is ‘n toename in video’s wat wys hoe migrante kwansuis met die polisie in gevegte is of winkels plunder. Baie van hierdie video’s is óf oud, óf dit het in ander lande gebeur. Sommige word selfs met KI gemaak.
Verder sirkuleer dokumente wat lyk of dit van die departement van binnelandse sake kom. Een spesifieke kennisgewing bied ‘n “beloning” aan mense wat inligting verskaf oor die verblyfplek van ongedokumenteerde migrante. Die departement van binnelandse sake het dit as vals afgemaak.
Die boodskap van die regering aan die publiek is om uiters versigtig te wees met wat jy glo en deel. Burgers word aangemoedig om inligting by betroubare bronne te verifieer.
Bron: Departement van Kommunikasie Suid-Afrikaanse Regering
