LIMPOPO. – Die Polokwane-polisie doen ‘n beroep op die publiek om te help om Clinton Cloud van der Merwe (42) op te spoor wat as vermis aangemeld is.
Sers. Maphure Manamela, polisiewoordvoerder, sê Van der Merwe is volgens die polisie op Woensdag 15 Julie omstreeks 15:30 laas deur sy ouma gesien toe hy haar by haar woning in Flora Park, Polokwane, besoek het. Sy familie weet nie waar hy tans is nie. Dit is ook nie bekend wat hy aangehad het toe hy laas gesien is nie.
Enigiemand met inligting wat die polisie kan help om Van der Merwe op te spoor, kan sers. Mokgadi Molope by 082 728 9831 of Crime Stop by 08600 10111 skakel, of die inligting by die naaste polisiestasie aanmeld. Inligting kan ook via die MySAPS-toepassing gegee word.
