GAUTENG. – Die polisie het Donderdag ‘n J51 – deursoekings-en-beslagleggingsoperasie in Pretoria-Noord as deel van ‘n voortgesette ondersoek uitgevoer. Die saak sal na verwagting vandag (Dinsdag) in die Pretoria-Noord-landdroshof voorkom, maar owerhede het nog nie amptelike besonderhede oor die verdagte of die aard van die aanklagte bevestig nie.
Brig. Athlenda Mathe, nasionale polisiewoordvoerder, het gesê die inligting van die operasie is deur ‘n onbekende bron aan die media uitgelek. Die optrede vorm deel van breër ondersoeke wat tans deur die polisie uitgevoer word. Sy het reeds Donderdag die media versoek om nie foto’s van die betrokke woning te neem of te publiseer nie en ook nie die identiteit van beamptes wat die lasbrief uitvoer, bekend te maak nie.
Volgens berigte deur onder meer SABC News hou die operasie waarskynlik verband met sers. Fannie Nkosi, ’n lid van Gauteng se eenheid vir georganiseerde misdaad. Nkosi het onlangs voor die Madlanga-kommissie van ondersoek getuig, waar hy volgens die berigte onder skoot gekom het oor teenstrydighede in sy getuienis en bewerings dat hy moontlik as tussenganger tussen misdaadbase en amptenare opgetree het. Berigte dui voorts daarop dat die deursoeking deel is van ’n ondersoek om bewyse te verifieer en teenstrydighede wat tydens die kommissie se verrigtinge na vore gekom het, te toets.
Hoewel die SAPD nog nie amptelik bevestig het dat die eiendom aan Nkosi behoort nie, word dit wyd in mediaberigte so aangevoer.
