KWAZULU-NATAL. – Die polisie waarsku die publiek om nie boodskappe, stemnotas of sosialemediaplasings te deel wat geweld of skade aan eiendom aanhits nie.
Volgens polisiewoordvoerder, kol. Robert Netshiunda, kom die waarskuwing te midde van ’n toename in betogings in die provinsie. Hoewel die meeste optogte vreedsaam verloop het, is die polisie bekommerd oor sekere aanlyn plasings en openbare uitsprake wat spanning kan aanhits en tot onrus kan lei. Die polisie herinner die publiek dat dit ’n misdryf is ingevolge die wet op kubermisdaad om elektroniese boodskappe te versprei met die doel om geweld of skade aan eiendom aan te hits.
As voorbeeld wys die polisie op ’n vorige saak waar ’n individu skuldig bevind is nadat hy ’n stemnota versprei het wat geweld aangemoedig het. Hy is gevonnis tot ’n boete van R10 000 of drie jaar tronkstraf. Hoewel die reg om te betoog deur die grondwet beskerm word, beklemtoon die polisie dat dit verantwoordelik uitgeoefen moet word en nie ander mense se regte mag skend nie.
Die polisie sê hulle monitor sosiale media noukeurig en dat kubermisdaadeenhede optree teen plasings wat as gevaarlik beskou word. Owerhede waarsku dat enige persoon wat die wet oortree, streng volgens die wet hanteer sal word.
