VRYSTAAT. – Die voertuig van die vermiste Stephen Khanye (70) is Dinsdag ná ‘n intensiewe soektog by die Vaaldam naby Oranjeville opgespoor. Hy is op 15April in dieselfde omgewing (in Mafube) as vermis aangemeld.
Sers. Josephine Rani sê lede van die polisie se duikeenheid, onder leiding van sers. Zwielie Simamane, het ‘n operasie van stapel gestuur nadat inligting ontvang is van ‘n voertuig in die water wat met ‘n vermiste-persoon saak verbind word. Die duikers moes uitdagings soos sterk strome, gure weer en swak sigbaarheid trotseer. Die span van Bloemfontein het verskeie diepwaterduike uitgevoer en ná ses pogings die voertuig onder ’n brug in die Oranjeville-gebied gevind. Sy het die duikers se optrede geprys.
Weens ongunstige weerstoestande en veiligheidsrisiko’s is die berging van die voertuig voorlopig gestaak. Dit sal hervat word wanneer toestande dit toelaat.
Die ondersoek duur voort.
