WES-KAAP. – ‘n Polisiekonstabel (30) van Khayelitsha-polisiestasie is Woensdagaand tydens ‘n misdaadvoorkomingsoperasie in Blok-Q in die area doodgeskiet. Verdagtes word sedertdien gesoek.
Brig. Novela Potelwa sê ‘n gewapende verdagte het op die polisielede geskiet toe hulle omstreeks 21:30 met ‘n stop-en-deursoekingsoperasie besig was. Die Valke (DPCI) behartig die ondersoek na ‘n moorddossier geopen is.
Potelwa sê die polisie in die provinsie is beskok oor die moord op die konstabel.
“Die kollegas van die afgestorwe lid word tans deur gesondheid- en welstandpraktisyns van die polisie (EHW) ondersteun.”
Die konstabel se identiteit sal bekend gemaak word wanneer sy naasbestaandes van sy dood ingelig is.
Lt.genl. Thembisile Patekile sê alle hulpmiddele sal ingespan word om die skuldige op te spoor.
“Dit is ontnugterend dat polisiebeamptes wat ontplooi word om veiligheid na gemeenskappe te bring, vind dat hulle deur misdadigers geteiken word. Ons versterkte ontplooiings is hard aan die werk in pogings om die verdagte vas te trek.”
