WES-KAAP. – ‘n Polisiekonstabel (31), gestasioneer by Laingsburg-polisiekantoor, is Vrydag vir sy beweerde betrokkenheid by dwelmhandel in die Sentraal-Karoo in hegtenis geneem. Die inhegtenisneming volg op maande lange ondersoekwerk wat reeds in 2025 begin het.
AO Christopher Spies, polisiewoordvoerder, sê die konstabel is tydens ’n geteikende operasie by ’n vulstasie in Voortrekkerweg vasgetrek. Verskeie eenhede, insluitend georganiseerde misdaad, K9, misdaadintelligensie en ’n hommeltuigspan, het aan die operasie deelgeneem. Volgens Spies is Mandrax-tablette, tik en kontant tydens die operasie gevind en op beslag gelê. Die verdagte is daarna op aanklagte van dwelmhandel in hegtenis geneem.
Die konstabel se 30-jarige vriendin is ook in hegtenis geneem en staan tereg op soortgelyke aanklagte. ’n Derde man (39) wat saam met hulle was, is ook vasgetrek nadat ammunisie glo in sy besit gevind is.
Die drie verdagtes was in aanhouding en sal na verwagting vandag (Maandag) op die aanklagte in die Laingsburg-landdroshof verskyn.
