OOS-KAAP. – ’n Vroulike polisiekonstabel wat Sondag van diens af was, is ná 17:00 buite ’n winkel op die hoek van Du Plessisstraat en Main Road in Humansdorp tydens ’n beweerde kapingspoging deur twee gewapende mans aangeval. Sy het vir haar lewe baklei totdat hulp opgedaag het.
Luidens ’n verklaring deur polisiewoordvoerder, AO Majola Nkohli, het die verdagtes glo probeer om die konstabel in die kattebak van haar voertuig te dwing, waartydens sy haarself verdedig het totdat private gewapende reaksie- en polisiebeamptes opgedaag het.
’n 18-jarige verdagte is in hegtenis geneem, terwyl ’n tweede verdagte weggekom het. ’n Replika-vuurwapen is op die toneel gevind.
Die verdagte sal vandag op aanklagte van poging tot kaping, poging tot ontvoering, aanranding met die opset om ernstig te beseer en ’n oortreding van die vuurwapenbeheerwet in die Humansdorp-landdroshof verskyn.
