WES-KAAP. – ’n Walviskarkas het langs die kus tussen Papendorp en Strandfontein uitgespoel, waarna ’n gesondheids- en veiligheidswaarskuwing aan die publiek gerig is.
Luidens ‘n verklaring deur die Matzikama-munisipaliteit in Vredendal kan die karkas ernstige gesondheidsrisiko’s weens bakterieë, ontbindingsgasse en ander moontlike gevare inhou. Die publiek word versoek om nie die walvis of enige dele daarvan aan te raak nie. Daar moet ook liefs nie naby die karkas gespeel word, of in die see in die omgewing geswem word nie.
Die publiek word verder aangeraai om te alle tye ’n veilige afstand te handhaaf en om troeteldiere van die area weg te hou. Samewerking word gevra in belang van openbare gesondheid en veiligheid.
