LIMPOPO. – ’n Manlike radiopersoonlikheid (42) het Donderdag op ‘n aanklag van verkragting in die Moutse-landdroshof verskyn nadat hy na bewering sy eksmeisie, ‘n vroulike aanbieder van ‘n plaaslike radiostasie, verkrag het. Hy is op borgtog van R2 000 vrygelaat.
Luidens ‘n verklaring van brig. Hlulani Mashaba, polisiewoordvoerder, hou die aanklag verband met ’n voorval wat na bewering op Vrydag 26 Desember 2025 kort voor 11:00 by ’n RDP-huis in Walkaal plaasgevind het. Die klaagster het aangemeld dat sy na bewering deur haar kollega en voormalige kêrel, ook ’n radiopersoonlikheid, verkrag is. Volgens die klaagster het sy ná werk teruggekeer na die radiostasie om besittings te gaan haal. Die verdagte het haar glo gevolg en aangebied om te help om die items na haar woonplek te dra, waar die beweerde voorval plaasgevind het. Die man is op 30 Desember 2025 in hegtenis geneem en het dieselfde dag in die hof verskyn. Hy het in aanhouding gebly totdat die saak Donderdag in die hof voorgekom het.
Die saak is vir verdere verrigtinge tot 16 Maart uitgestel.
