GAUTENG. – Die Suid-Afrikaanse Gesondheidsprodukte Reguleringsowerheid (Sahpra) waarsku teen gesondheidsaanvullingsprodukte vir kinders wat sinkpikolinaat en/of selenium bevat. Dié bestanddele is nie vir kinders onder 18 jaar toelaatbaar nie. Verkoop van sulke Kategorie D-produkte moet binne ses maande ná publikasie van die kennisgewing gestaak word. Alle betrokke produkte moet vir registrasie as Kategorie A-medisyne by Sahpra ingedien word.
Luidens ’n verklaring deur die reguleringsowerheid is sinkpikolinaat en selenium ingevolge riglyn 7.04 onaanvaarbaar weens veiligheidsrisiko’s. Sahpra sê sinkpikolinaat kan newe-effekte soos naarheid, braking, diarree en hoofpyn veroorsaak, terwyl selenium ’n risiko van oordosering inhou wanneer dit algemeen aan kinders toegedien word.
Die owerheid het verder aangedui dat verskeie van die betrokke produkte as sogenaamde “immuunversterkers” vir kinders bemark word en vir toestande soos verkoue, griep en diarree aangedui is, wat dit as medisyne klassifiseer wat registrasie vereis. “Enige produk wat sinkpikolinaat of selenium bevat en vir kinders bedoel is, kwalifiseer nie as ’n Kategorie D-komplementêre medisyne nie,” het Sahpra gesê.
Gesondheidswerkers is versoek om die verspreiding en verkoop van hierdie produkte onmiddellik te staak, terwyl die publiek aangemoedig word om dit na apteke of verskaffers terug te neem.
Druk hier om meer te lees.
