WES-KAAP. – Die DA sê interregeringsamewerking is noodsaaklik vir die R17,4 miljard-projek vir die suksesvolle uitbreiding van Kaapstad Internasionale Lughawe.
Noko Masipa, DA-woordvoerder oor landbou, ekonomiese ontwikkeling en toerisme, sê die projek vorm deel van ’n vyfjaarplan om kapasiteit te verhoog en ekonomiese groei en toerisme te ondersteun. Die lughawe nader tans sy maksimum kapasiteit en die uitbreiding sal meer vlugbeweging en beter passasiersfasiliteite moontlik maak.
Die projek sluit onder meer nuwe terminale, verbeterde bagasiehantering en die bou van ’n nuwe herbelynde aanloopbaan in. Tydens die voorbereidende fase is sowat 216 werksgeleenthede geskep. Masipa sê die ontwikkeling kan groot ekonomiese voordele inhou, maar waarsku dat grondtoegangskwessies eers opgelos moet word om vertragings te voorkom.
