WES-KAAP. – Suid-Afrikaanse Nasionale Parke (SANParke) het ná ’n volledige operasionele hersiening nuwe veiligheidsmaatreëls ingestel om die see-, lug- en bergeenheid (SEAM) van die Tafelberg Nasionale Park te versterk.
Volgens ‘n sosialemediaplasing van SANParke Table Mountain National Park is die honde-eenheid, wat ’n belangrike rol speel in patrollies, besoekerveiligheid en die bekamping van stropery, onlangs deur onafhanklike kenners geëvalueer. Ná die ondersoek is sekere honde weens ouderdom of gesondheid afgetree terwyl ander waar nodig na verskillende SANParke-eenhede verskuif is om hul vaardighede beter aan te wend. Die oorblywende dienshonde en hul hanteerders is aktief betrokke by daaglikse operasies, met die fokus op die beskerming van besoekers en die park se natuurlike omgewing. Die organisasie se aanpasbare bestuursbenadering beteken dat die hulpbronne deurlopend hersien en verbeter word.
Verbeterings is ook aangebring aan die honde se verblyfgeriewe en bykomende opleiding en ontwikkelingsprogramme vir hanteerders is ingestel, om hoë prestasie en goeie dierewelsyn te verseker. SANParke werk saam met die K9 Project Watchdog, die ereveldwagters en verskeie borge en vennote wat die program ondersteun.
Nuwe honde en hanteerders sal in die komende maande by die eenheid aansluit om op die bestaande werk voort te bou. SANParke sê die TMNP-honde-eenheid bly ’n kernonderdeel van hul verbintenis om beide mens en natuur te beskerm.
