KWAZULU-NATAL – ’n Lid van die sekuriteitsmaatskappy, Reaction Unit South Africa, is die naweek deur ’n man wat onder die invloed van drank was, aangeval en gebyt. Dit volg nadat hy toegang tot ’n sakeperseel in Tongaat geweier is.
Die sekuriteitsbeampte het oop wonde aan sy linkerborskas en ander wonde oor sy lyf opgedoen. Hy is op die toneel deur paramedici behandel.
Bystandbeamptes het opgedaag nadat die supermark gebel het om ’n man wat besig was om alkohol in te neem en gewelddadig opgetree het, te verwyder. Hy is toegang geweier en het die een beampte met ’n bierbottel geslaan en gebyt.
Traangas is gebruik om die situasie te ontlont. Gevolglik het die verdagte op vlug geslaan. Hy is later deur middel van CCTV-beeldmateriaal geïdentifiseer, maar het weer op vlug geslaan toe hy beamptes naby sy woning gewaar het.
Bronne: Reaction Unit South Africa, Facebook
