KWAZULU-NATAL. – ’n Polisiesersant is Woensdag voorlopig van haar verkiesingspligte onthef. Dit volg nadat sy na bewering by ’n stemlokaal in die Mphithini-gebied by Donnybrook opgedaag het in ’n voertuig met plakkate van ’n politieke party daarop.
Polisiewoordvoerder kol. Robert Netshiunda sê die polisie ondersoek die voorval en interne dissiplinêre stappe kan volg. Die stemproses by die betrokke stemlokaal het normaal voortgegaan. Die polisie sal ook ondersoek instel of enige wetgewing oortree is.
In ’n afsonderlike voorval is ’n man Woensdagoggend by ’n stemlokaal in die M-afdeling van Umlazi in hegtenis geneem nadat hy na bewering polisiebeamptes aangerand het. Hy het glo by die stemlokaal opgedaag terwyl hy alkohol gebruik het en het volgens die polisie aggressief opgetree toe beamptes hom probeer hanteer het. Hy is vir aanranding in hegtenis geneem. Verdere aanklagte ingevolge die verkiesingswet kan bygevoeg word.
Drie K9-polisielede het ook ligte beserings opgedoen toe die voertuig waarin hulle op pad na ’n stemlokaal was, teen twee beeste in die Ibisi-polisiegebied gebots het. Hulle is reeds uit die hospitaal ontslaan en is geskik om hul pligte te hervat.
