GAUTENG. – Twee sersante van die polisie se Taktiese Reaksie-eenheid het Dinsdag in Witbank, Mpumalanga, in ‘n motorongeluk gesterf. Hulle was onderweg na Pretoria om in hofsake te getuig.
Brig. Athlenda Mathe, nasionale polisiewoordvoerder, sê die bestuurder van die staatsvoertuig waarin die beamptes gery het, het glo beheer oor die voertuig verloor, wat tot die noodlottige ongeluk gelei het. Die beamptes was verbonde aan die eManguzi-taakspan in KwaZulu-Natal, waar hulle oorgrensmisdade bestry het. Die name van die beamptes sal eers bekend gemaak word nadat hul families ingelig is. Die polisie se Werknemer Gesondheid- en Welstandseenheid is intussen ontplooi om ondersteuning aan die families en kollegas van die oorledenes te bied.
Lt.gen. Puleng Dimpane, die waarnemende nasionale polisiekommissaris, het haar medelye teenoor die families, vriende en kollegas van die oorledenes uitgespreek.
