GAUTENG. – Garsfontein-polisie is Maandagaand omstreeks 20:30 ingelig oor skote wat by ’n woning in Cameliastraat 61, Lynnwood, gehoor is.
Kapt. Johan van Dyk, distrik-polisiewoordvoerder, sê gemeenskapslede het die skote gehoor en die polisie in kennis gestel. Met aankoms op die toneel is beamptes deur ’n huiswerker ingelig dat die 59-jarige eienaar van die woning glo ’n vuurwapen in die perseel afgevuur het. Polisie-onderhandelingspanne is ontbied om die situasie te stabiliseer. Hulle het daarin geslaag om met die vrou te kommunikeer, haar te kalmeer en haar veilig te ontwapen sonder enige beserings.
Voorlopige inligting dui daarop dat sy verward was, nie die gebeure kon herroep nie en onreëlmatige gedrag getoon het. Nooddienste is ingeroep en, in oorleg met haar familie, is sy gesedeer en na die Pretoria Moot-hospitaal geneem vir verdere mediese observasie en evaluering. Daar is ook vasgestel dat sy voorheen soortgelyke episodes ervaar het.
Misdaadtoneel- en forensiese spanne het die toneel verwerk as deel van die ondersoek. Vuurwapens wat in die vrou se besit gevind is, is gekonfiskeer en vir veilige bewaring by die polisie ingeboek. ’n Saak van die afvuur van ’n vuurwapen is geopen en die ondersoek duur voort.
PVES sê mediese personeel is op ’n veilige afstand op bystand gehou en was gereed om in te gryp indien nodig. Vision Tactical was ook op die toneel.
