KAAPSTAD. – Die Suid-Afrikaanse regering is ingelig oor ‘n groot Maersk-vragskip, die Maersk Campton, wat ongeveer 327 ton gevaarlike afval aan boord het en probeer het om by Kaapstad-hawe te dok. Die skip het egter volgens berigte verdwyn nadat ‘n internasionale waakgroep, die Basel Action Network (BAN), die waarskuwing uitgereik het.
Die Maersk Campton, een van twee skepe wat 100 houers afval van Albanië na Thailand vervoer, het op 31 Julie sy Outomatiese Identifikasiesisteem (AIS) GPS-sein afgeskakel en nie in Kaapstad aangekom soos verwag nie. Volgens die SOLAS-konvensie (International Convention for the Safety of Life at Sea) van die Internasionale Maritieme Organisasie, moet die AIS-sein altyd aan wees, behalwe in geval van onmiddellike gevaar. Die skip se ligging is meer as ‘n week gelede laas opgedateer
BAN sê die vervoer van gevaarlike afvalstowwe sonder die goedkeuring van die uitvoerland (in hierdie geval Albanië), die oordragland (Suid-Afrika) en die geskeduleerde invoerland (Thailand) is onwettige afvalsmokkelary volgens die bepalings van die Basel-konvensie. Volgens berigte is Albanië nooit deur die uitvoerder oor die uitvoer ingelig nie, en Thailand is ook nie in kennis gestel nie. Verder is oordraglande, insluitend Suid-Afrika, ook nie van die versending in kennis gestel nie.
’n Tweede skip, die Maersk Candor, wat 60 houers gevaarlike afval dra, is ook op ‘n soortgelyke roete.
BAN en ander omgewingsorganisasies vra dat die skepe voorgekeer moet word en die vraghouers met afval teruggestuur word na Albanië.
