OOS-KAAP. – Vier mense, insluitend ’n vrou, is in hegtenis geneem ná ’n grusame voorval waarin drie mans oor beweerde kabeldiefstal deur ’n woedende skare aangeval en aan die brand gesteek is.
Kapt. Welile Matyolo, polisiewoordvoerder, sê die voorval het op 7 April 2026 in die Empa-gebied plaasgevind nadat inwoners die drie mans van kabeldiefstal beskuldig het. Die slagoffers is glo aangerand voordat hulle langs die pad aan die brand gesteek is. Een man is op die toneel dood, terwyl ’n tweede later op pad hospitaal toe aan sy beserings beswyk het. ‘n Derde slagoffer het oorleef en is in die hospitaal opgeneem vir behandeling. Die polisie se ondersoek het Donderdag tot die inhegtenisneming van drie mans en ‘n vrou gelei.
Die beskuldigdes sal na verwagting vandag (Vrydag) op twee aanklagte van moord en een van poging tot moord in die Bityi-landdroshof verskyn. Gemeenskappe word deur die polisie gewaarsku om nie die reg in eie hande te neem nie. Dit word beklemtoon dat sulke optrede ernstige regsgevolge, insluitend lewenslange tronkstraf, kan hê.
