Die Springbokke teen All Blacks in Kaapstad is uitverkoop en die Stad Kaapstad verwag 62 000 toeskouers by die DHL-stadion wanneer die twee spanne Saterdag 29 Augustus om 17:10 afskop.
Die Stad het saam met SA Rugby en die Suid-Afrikaanse Polisiediens ’n omvattende vervoerbestuursplan opgestel om toeskouers na en van die stadionomgewing te beweeg. Die hekke by die stadion open om 12:00.
Padsluitings in Groenpunt en Granger Bay
Padsluitings en beperkings geld van 06:00 tot 22:30 op Saterdag 29 Augustus. Die volgende paaie word geraak:
- Granger Boulevard tussen die Green Point-sirkel en Beach Road
- Beach Road in Granger Bay
- Fritz Sonnenberg Road tussen Granger Boulevard en Beach Road
- Stephan Way tussen Fritz Sonnenberg Road en Hamilton’s Rugbyklub
- Vlei Road tussen Helen Suzman Boulevard en Fritz Sonnenberg Road
- Fort Wynyard Street tussen Portswood Road en Granger Bay Boulevard
- Granger Bay Boulevard tussen Helen Suzman Boulevard en Beach Road
Inwoners en motoriste moet ook swaarder verkeer in en om die middestad, Groenpunt en die stadionomgewing verwag.
Parkering: 475 gratis plekke by die Burgersentrum
Parkering in en om die stadion is beperk, maar daar is genoeg parkering in die middestad vir ondersteuners wat die pendeldiens of die FanWalk na Groenpunt gebruik.
Die Stad stel 475 gratis parkeerplekke by die Burgersentrum beskikbaar aan ondersteuners met kaartjies, op ’n eerste-kom-eerste-bedien-grondslag vanaf 11:00. Die parkeerareas is toeganklik vanaf Hertzog Boulevard inkomend en Civic Road.
By die Universiteit van Kaapstad kan toeskouers op Boonste Kampus parkeer en die pendeldiens by die noordelike pendelstop by Madiba-sirkel haal.
Betaalparkering is beskikbaar by die CTICC, Ryk Tulbagh-plein, Picbel Parkade, Plein Park, die Parkalot in Jack Craig Street en Harbour Arch in Harbour Arch Boulevard. Gratis straatparkering in die middestad is vanaf 13:00 beskikbaar, onderworpe aan die geldende beperkings.
’n Toegewyde e-hail-fasiliteit word by P14 in Green Point Main Road tussen York Road en Wigtown Road opgerig. Ondersteuners wat e-hail-dienste gebruik, word aangemoedig om dié fasiliteit te gebruik sodat verkeer om die stadion vlot beweeg.
MyCiTi-pendeldiens vanaf vyf punte
Die MyCiTi-pendeldiens loop vanaf 11:30 van vyf punte af: die Burgersentrum, Thibault Square, die CTICC, die Universiteit van Kaapstad en die Bellville-velodroom.
Die pendeldiens ry in ’n toegewyde baan wat met keëls afgesper is, wat beteken ondersteuners omseil die verkeerstou. Die laaste terugrit van die stadion af na die aangewese oplaaipunte vertrek om 22:30.
Stad vra ondersteuners om vroeg te beplan
“Met ’n vol stadion en duisende mense wat in en om die middestad en Groenpunt verwag word, verwag ons aansienlike verkeersopeenhoping op wedstryddag. Baie beplanning is gedoen om die beweging van toeskouers en verkeer te bestuur,” het JP Smith, burgemeesterskomiteelid vir veiligheid en sekuriteit, gesê.
“Ons moedig ondersteuners aan om hulle reise vroeg te beplan, waar moontlik van die beskikbare pendeldienste gebruik te maak en met genoeg tyd op hande op te daag.”
Smith het bygevoeg dat die Stad se dienste saam met die polisie sal werk om ’n veilige en goed bestuurde geleentheid te verseker.
Meer inligting oor dié en ander geleenthede in Kaapstad is by eventsincapetown.com beskikbaar.
*Persverklaring
