GAUTENG. – Adv. Lucas Motshabi (42), ‘n senior staatsaanklaer wat verbonde is aan die Kimberley-batebeslagleggingseenheid se kantoor vir openbare vervolging, is in die Pretoria-Noord-landdroshof borgtog geweier. Hy is aangekla in ’n saak wat met beweerde huishoudelike geweld verband hou.
Lumka Mahanjana, NVG-woordvoerder, sê die aanklagte sluit die oortreding van ’n beskermingsbevel, aanranding met die opset om ernstig te beseer en skade aan eiendom in. Die beskermingsbevel is glo in November 2025 deur sy vrou verkry. Hoewel albei partye later sake teen mekaar teruggetrek het, het spanning voortgeduur.
Daar word beweer dat Motshabi op 21 Februarie 2026, kort nadat die sake teruggetrek is, na hul voormalige woning in Pretoria-Noord is, ten spyte van borgtogvoorwaardes wat dit verbied het. ’n Argument het ontstaan en hy het glo sy vrou aangerand, skade aan die eiendom aangerig en haar voertuig se bande stukkend gesteek voordat hy die toneel verlaat het. Hy het homself later aan die polisie oorgegee en is in hegtenis geneem.
Borg is deur die staat teengestaan weens die erns van die aanklagte, en omdat die klaer vir haar lewe vrees. Die hof het saamgestem en bevind daar is ook ’n moontlike vlugrisiko. Volgens die NVG wys die besluit duidelik dat geen geweld in huishoudings geduld sal word nie, ongeag wie betrokke is.
Die saak is vir verdere hofverrigtinge tot 7 Mei 2026 uitgestel.
