John Steenhuisen, die minister van landbou, waarsku dat ‘n dreigende hofsaak die regering se beplande uitrol van entstowwe teen bek-en-klouseer (BKS) kan ontspoor.
Die departement van landbou sê hy het ’n regsbrief ontvang van Saai, Sakeliga en Vrystaat Landbou waarin geëis word dat veeboere toegelaat moet word om entstowwe privaat toe te dien, terwyl met regsaksie teen die staat gedreig word. Volgens die departement word daar terselfdertyd veldtogte op sosiale media, WhatsApp en SMS gevoer om befondsing vir die beoogde hofsaak in te samel.
Bek-en-klouseer is ’n beheerde dieresiekte ingevolge die wet en die departement sê hy is wetlik verplig om die bestaande raamwerk te volg. Die regering het reeds twee miljoen entstowwe van die Botswana Vaccine Institute verkry en toegedien, terwyl invoerpermitte vir private maatskappye om entstowwe in te voer, reeds begin is.
Die departement waarsku egter dat die dreigende hofaksie die aankoop en uitrol van entstowwe kan vertraag en kritieke veeartseny- en finansiële hulpbronne van die stryd teen BKS kan wegtrek. Volgens die departement sal ongekontroleerde toegang tot entstowwe die land se kanse benadeel om sy BKS-vrye status met inenting te herwin, soos vereis deur die Wêreldorganisasie vir Dieregesondheid.
Die departement sê die private sektor en bedryfsorganisasies is reeds by elke fase van die proses betrek en dat samewerking met private veeartse en tegnici sal voortgaan tydens die inentingsveldtog.
John Steenhuisen se verklaring:
